ਸਿੰਗਾਪੁਰ 'ਚ ਸਕੂਬਾ ਡਾਈਵਿੰਗ ਹਾਦਸੇ 'ਚ ਅਸਾਮੀ ਗਾਇਕ ਜ਼ੁਬੀਨ ਗਰਗ ਦਾ ਦੇਹਾਂਤ

ਸਿੰਗਾਪੁਰ ਵਿੱਚ ਇੱਕ ਦੁਖਦਾਈ ਸਕੂਬਾ ਡਾਈਵਿੰਗ ਹਾਦਸੇ ਦੇ ਦੌਰਾਨ ਮਸ਼ਹੂਰ ਅਸਾਮੀ ਗਾਇਕ ਅਤੇ ਸੱਭਿਆਚਾਰਕ ਆਈਕਨ ਜ਼ੁਬੀਨ ਗਰਗ ਦੀ 52 ਸਾਲ ਦੀ ਉਮਰ ਵਿੱਚ ਮੌਤ ਹੋ ਗਈ। ਗਰਗ, ਜੋ ਆਪਣੇ ਸੁਪਰਹਿੱਟ ਗੀਤ ‘ਯਾ ਅਲੀ’ ਦੇ ਲਈ ਰਾਸ਼ਟਰੀ ਪੱਧਰ 'ਤੇ ਮਸ਼ਹੂਰ ਸਨ, ਅੱਜ ਨੌਰਥ ਈਸਟ ਫੈਸਟੀਵਲ ਵਿੱਚ ਪ੍ਰਦਰਸ਼ਨ ਕਰਨ ਵਾਲੇ ਸਨ।

ਰਿਪੋਰਟਾਂ ਮੁਤਾਬਿਕ, ਸਕੂਬਾ ਡਾਈਵਿੰਗ ਦੌਰਾਨ ਉਹ ਸਮੁੰਦਰ ਵਿੱਚ ਡਿੱਗ ਗਏ। ਸਿੰਗਾਪੁਰ ਪੁਲਿਸ ਨੇ ਤੁਰੰਤ ਰੈਸਕਿਊ ਕਰਕੇ ਨੇੜਲੇ ਹਸਪਤਾਲ ਵਿੱਚ ਪਹੁੰਚਾਇਆ, ਪਰ ਡਾਕਟਰੀ ਕੋਸ਼ਿਸ਼ਾਂ ਦੇ ਬਾਵਜੂਦ ਉਹ ਬਚ ਨਹੀਂ ਸਕੇ।

ਜ਼ੁਬੀਨ ਗਰਗ ਨੇ 1990 ਦੇ ਦਹਾਕੇ ਵਿੱਚ ਅਸਾਮ ਵਿੱਚ ਪ੍ਰਸਿੱਧੀ ਹਾਸਲ ਕੀਤੀ ਅਤੇ 2006 ਵਿੱਚ ਰਾਸ਼ਟਰੀ ਪੱਧਰ 'ਤੇ ਮਸ਼ਹੂਰ ਹੋਏ। ਉਨ੍ਹਾਂ ਦੀ ਅਚਾਨਕ ਮੌਤ ਨਾਲ ਭਾਰਤ ਦੇ ਸੰਗੀਤ ਉਦਯੋਗ ਅਤੇ ਉੱਤਰ-ਪੂਰਬੀ ਭਾਈਚਾਰੇ ਵਿੱਚ ਸੋਗ ਦੀ ਲਹਿਰ ਪੈ ਗਈ ਹੈ। ਅਸਾਮ ਦੇ ਕੈਬਨਿਟ ਮੰਤਰੀ ਅਸ਼ੋਕ ਸਿੰਘਲ ਨੇ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਦੀ ਮੌਤ ਦੀ ਪੁਸ਼ਟੀ ਕੀਤੀ।